ಅವ್ವ ಅಲ್ಲವೋ....
ನಾ... ನಿನ್ನ ಅಕ್ಕ...
ಬೆಕ್ಕು ಕಂಡರು ಪಕ್ಕನೆ ತೆಕ್ಕಿಬೀಳುವ
ಕಪ್ಪು ಕತ್ತಲ ಪರದೆಗೂ ರೆಪ್ಪೆ ಬಿಗಿಯುವ
ಪುಟು ಪುಟು ಹೆಜ್ಜೆಯ ಪುಕ್ಕನನ್ನು
ಲಂಗದ ನಿರಿಗೆಯಲ್ಲಿ ಬಚ್ಚಿಟ್ಟುಕೊಂಡವಳು...
ಮಣ್ಣು ಗೋಡೆಗೆ ಮೊಳೆ ಹೊಡೆದು
ನಿನ್ನ ಚೋಟುದ್ದದ ಅಂಗಿ ಚಡ್ಡಿ ಸಿಕ್ಕಿಸಿ
ಅರಳುಗಣ್ಣಿಗೆ ತುಂಬಿಸಿ
ಚಪ್ಪಳೆ ತಟ್ತಿ ಕುಣಿದವಳು....
ಅಪ್ಪ ಕೊಟ್ಟ ಒಂದೇ ದುಡ್ಡಿಗೆ
ಎರಡು ಬಂಬೈ ಮಿಠಾಯಿ ಗುಡ್ಡಗಳು
ನಿಂದೆಲ್ಲ ನುಂಗಿ, ನನ್ನದೂ
ಇಡಿಯಾಗಿ ನೆಕ್ಕಿ ನಕ್ಕಾಗ
ದನಿ ಎತ್ತದೆ ಜೊಲ್ಲು ನುಂಗಿದವಳು....
ಬಾಗಿಲು ದಾತಟುತ್ತಲೇ ಬಗಲೇರಿ ಕುಂತು
ಒಲ್ಲದ ಶಾಲೆಯ ಹಾದಿಯ
ನಡುವೆ ... ಕಲ್ಲ ಮೇಲೆ ಗುದುಮುರುಗಿ
ಅತ್ತು ಕರೆದು ... ಚೂರಿ-ಗೀರಿ
ಅಕ್ಕೊರು ಕಾಣುತ್ತಲೇ ಗಪ್ ಚಿಪ್....
ಎಳೇ ಉಗುರಿನ ಗೀರೂ
ನೆತ್ತರು ಜಿನುಗಿಸಿದ ಕೈಯ
ಅವ್ವನ ಮುಂಚಾಚಿ
ಲಂಗದ ಚುಂಗಿನಿಂದ ಕಣ್ಣೊತ್ತಿಕೊಂಡಾಗ...
'ಛೀ ... ಸಣ್ಣ ತಮ್ಮ ಚೂರಿದರ
ಬಿಕ್ಕಿ ಬಿಕ್ಕಿ ಅಳತೀಯ.......
ಹುಚ್ಚೀ ಹಳೆ ಹುಚ್ಚಿ ಎಂದಾಗ....
ಅವರೆ ಚಪ್ಪರದಡಿ ಅಡಗಿ .... ಉಡುಗಿ...
ಉಫ್ ಉಫ್ ಊದಿಕೊಂಡವಳು..
ಇಲ್ಲಿ... ಇಲ್ಲೀಗ ...
ನನ್ನ ಖೋಲಿಯ ಗೋಡೆಯ ಮೂಲೆಗೆ
ಕೊಟ್ಟ ಮನೆಯ ದತ್ತ ನೆನಪಿಗೆ
ಗುರುತಾಗಿ ಉಳಿದವರ.....
ಕೈಯ ಹಿಡಿದವರ ... ಒಡನೆ ನಡೆದವರ ....
ಬಳಗ... ಭಾವ ಚಿತ್ರಗಳ ಸಾಲು
ಎಲ್ಲಕೂ ಸೇರಿ ಸುತ್ತು ಬಂದ
ಗಂಧ ಆರಿದ ಗಂಧದ ಹಾರ....
ಕಳೆದು ಹೋದವರು ಕ್ರಮವಾಗಿ ಕುಂತಿಲ್ಲ
ಅಲ್ಲಿ.......
ವಯಸು ವಯಸಿನ ಸರದಿ ಸಾಲು ಅಲ್ಲ
ಅಂಗಿ ತೊಟ್ಟ ತಂಗಿ..... ಪಟಗ ಸುತ್ತಿದ ಅಪ್ಪ....
ಟೈ ಕಟ್ಟಿದ ಅಣ್ಣ...
ಮುಸುಕು ಸೆರಗಿನ ಅವ್ವ ಕೊನೆಗೆ.......
ಯಾರ ಭಾವಚಿತ್ರದ ನೋಟ
ಯಾರ ಕಣ್ಣಿಗೆ ಉಂಟೋ
ಬದುಕು .... ಆದರೂ... ಇದಕೂ
ಭಾವ ಬಂಧುರದ ನಂಟು
ಅವ್ವ ಅಲ್ಲವೋ ... ನಾ ನಿನ್ನ ಅಕ್ಕ
ಹೇಳದೆ ಹೇಗಿರಲಿ ... ?
ಹೆಕ್ಕದೇ ಹೇಗಿರಲಿ
ಅದು ನನ್ನ ನೆನಪಿನ ಬಿಕ್ಕು.....
‘ಅನಸೂಯ ಸಿಧ್ಧರಾಮ’
